Woeénwieke i Heèle
Heiónger vingd’r de name van de woeënwieke enj buëte i Heële mit hunne naam in ’t Heëlesj plat:
Eikenderveld Ekenderveld in ’t Ekenderveld
Grasbroek Grasbrook in de Grasbrook
Heerlen Heële i Heële
Heerlerbaan Heëlebaan óppen Heëlebaan
Heerlerheide Heëlehei óp Heëlehei
Heksenberg Hekseberg óp d’r Hekseberg
Hoensbroek Gebrook i Gebrook
Hoensbroek-Stat De Sjtasjon-kolonie i De Sjtasjon-kolonie
Mariagewanden Mariageweng i Mariageweng
Mariarade Mariaroa i Mariaroa
Molenberg Muüleberg óp d’er Muüleberg
Nieuw Einde Gen Ing óp Gen Ing
Passart Passart in de Passart
Schandelen Sjandele i Sjandele
Vrank De Vrank in De Vrank
Welten Welte i welte
(Bron: Plaatsnamelies/Plaatsnamenlijst Veldeke Limburg 2002)
Vier wille dees lies geer nog oetbreie met anger woeënwieke i Heële en umsjtrieëke.
Sjik ós estebleef uch aabevelinge en meninge: info@veldeke-heerlen.nl
Reaksies
Leef lüj va Veldekekrink Heële,
Geer wil ich rejagere óp uur saitmep Woeënwijke i Heële met dees anekdote en ee gedich:
In de joare sieëvetig zónge vier, jónge va Bekkerveld en umsjtrieëke, van de sjpaskapel "Vrung van 't Gewei" rónktrokke mit d'r vasteloavend of anger fieëstelike bijeekómste, en de sjtumming e bietje meëlig begós te weëde, ee bepaald leedje.
Egelik is 't kirkeleedje dat in 't latien "stabat mater doloroso" heesjde en in kirk bij d'r krütweëgplegtigheed woeëd gezónge. Dat leedje woeëd óp d'r hak genomme mit inne teks in 't Heëlesj plat. Heëlesje wijke woeëte bezónge en d'r krütsweëg gepersifleerd. Zoeë góng dat:
"Welte, Benzroa, Vrusjemig, Caumer
"Muëleberg en Sjandeler Getske
En de Hüskeskolonie"
Doanoa mós ieëme d'r nommer vanne sjtasie helóp rope en ing koddige zin loate volge, bevuurbild:
"Ieésjte Sjtasie: Deëke Bemelmans hat zich bij Schunck ing nuie pentie gegole" en da vólgde wer "Welte Benzroa..."
Bij gelegeheed wil ich 't kómme vuurzinge; dat huër ich da waal.
Dizze komiesje krütsweëg va doe hat mich noaderhank gebrach tot dees ode aa Heële.
Vazelf vingder doa waarsjienlig aavullinge vuur de woeënwijkelies van Veldekekrink Heële.
ala da, dat woar 't vuurleupig
Grus,
John Bovendeert
Heële, bis doe sjoeën ?
went ich mieng kingerskinger
zoeë sjpieële zieë
agen duur aatref of
róngsum de zeum va Heële
dan weëd ich mich gewaar,
wat vreuger tied mich nui gesjónke hat
ze hat mich mit ing sjtad bedach
ing sjtad, die mich hat groeëtgebrach
Welterviever, Zieëve Köpkes, Zandkoel
Benzroabusjke, Putberg, Beukekoel
Leenhof, Muëleberg, de Vossekoel
de Rousch, Locht, Eure, Caumer
Kissel, Welten, Óngersjte Caumer
Imstroabusj, Caldeborn, Vrusjemig
´t Loon, Beersdal, Musjemig
Doevewei, Valkenhoeze, Heesberg
Palemig, Heëlehei, Hekseberg
Sjandele, Huuskeskolonie, Heëlebaan
de Vrank, Meezenbrook, Eekederveld
Terworm, Oambusj en Bekkerveld
sjtukskes va mieng kingerwelt !
mieng vootsjtep hub ich geplaatsj
in zank en koalegruus va dich,
in dieng graas en zómpepratsj
tusje riele van mien sjtieëvelhek
kleënt ummer nog get löss
en leem va dich en drek
ee kink vruëgt sich neet aaf
of zieng mam waal sjoeën is!
John Bovendeert
12 september 2006