Zoa zagte ze in Zöstere
Beukske van en äöver Annie Schreuders-Derks
Oppe jaorlikse “Kroetwösjdaag” in Zöstere, vanne Vereniging van Natuurvrienden, ein van de zöstervereniginge van Veldeke Krink Ech is Annie Schreuders-Derks gehuldigdj mit ’n beukske in de serie “Susteren weerspiegeld”.
’t Beukske “Zoa zagte ze in Zöstere…” bevatj ’n groate hoeveelheid tekste vanne handj van Annie, die inne loup der jaore gepubliceerdj zeen gewaesj in ’t blaad “Heemklank” van die vereniging, wovan zie natuurlik lid is.
Weer kènne Annie es ambassadeur vanne Limburgse volkscultuur en in Ech-Zöstere de leste jaore väöral es väörgengster/conservator van ’t Museum van de Vrouw. Verzamele en vertèlle, det kós en kèntj ze. Alles verzamele äöver heem en volkscultuur, mer ouch ’t óntstaon enne achtergróndj d’rvan. En daoäöver vertèlle op häör eige sprankelendje meneer. De aandach trèkke en haoje is den gein prebleem.
Mer sjrieve kèntj ze ouch, gedichter en proza, dök mit daezelfdje cultuurhistorische achtergróndj, soms mit gedetailleerdje persuuenlike waornumming van zake.
Evert Zits woor degene dae in ’n oetgebrèdj äöverzich de literair óntwikkeling van Annie Schreuders-Derks en de verdeenste väör de volkscultuur en de Vereniging van Natuurvrienden in ’t bezunjer väör ’t vootleech brach. Det gebäördje in ‘ne volle zaal in Vastrada mit femielie, vrunj en bekèndje .
Väör de Krink Ech kömtj Annie op 21 sept. aanstaondje weer get vertèlle ónger de titel: “Van Sint Maerte tót Driekäöninge”.