Lintje vör ieërelid Jan Moonen

Oppe létste jaorvergadering hebbe vae oeëze sikkertaris beneumdj tot ieërelid vanne krînk Wieërt. Naeve ieëre-vuuërzitter Piet Hermans és hae daomej de twieëdje drager van d’n Umbelder. En hae hieëget verdeendj! Al 30 jaor és hae sikkertaris. Naeve de gebroêkelike sikkertarisactiviteite és Jan betrokke beej de organisatie van zoeëwat alle activiteite van Veldeke krînk Wieërt mer daonaeve ouch beej diverse aktiviteite op provinciaal nivo. Ge mótj dan dînke aan:  de organisatie van de jaorlikse excursie en dialectaovendje,   de coördinatie van cursusse en de Schriêverskringe Venlo en Wieërt,  zien wêrk as redactielid van verschillendje bukskes en binne de wêrkgroep Declamatiewedstriêd en  lid van de kemissie Veldeke Literair di-j jaorliks de organisatie en uutreiking vanne Veldeke Literatuurpriês organezieërtj.

Vae zeen neet de énnigste vereiniging binne Wieërt woeëbinne Jan actief és en di-j dao op ’n bezûndjer meneer uutdrökking aan woeëje gaeve. Ouch ’t Wieërter Mannekoeër woeëj ‘m wul wat vaere op z’nen hoed staeke. Hae és dao al lid van Verdeenste mer ouch redacteur van ’t WMK-Bulletin.

En dan wore d’r de Rogstaekers. Vörre boonte aovendje waas Jan 40 jaor actief o.a. as lidjesschriêver en zênger beej de Vastelaovendjzêngers en noow nog as schriêver en corrector van tekste vörre vastelaovendjgezét. Daovör és hae al beneumdj tot Groeët-offeseer inne Orde vanne Rog en ze hebbe ‘m ‘t Kammeräödje towgekindj; mer ouch zeuj woeëje wul wat mieër.

Same mét wéthaojer Harry Coolen woeërt ge-iêverdj vör ‘n kuuëninklike óngerscheî-jing.

Rizzeltaat van det âl waas det Harry – dits kieër as loco-börgemeister- oeës Ieërelid oppen daâg vanne prizzentasie van oeës spraekwoeërdebook Schoeën gezagdj! kos verrasse mét de mejdaeling detj Hare Majesteit behaagdj haaj hem te beneume tot Lid in de Orde van Oranje Nassau. Aansloêtendj speldje hae Jan de daobeej behuuërendje verseersele oppe kraag.

Beej dieëze nog mer ’s gezagdj: dik verdeendj!