Sjtil Sjtroate, door Ed Gubbels
Tien gedichten uit de cyclus Sjtil Sjtroate
pieng
ich han hüj
ee good gesjprek gehad
mit ing mieuw
ze keek mich aa
mit groeëte glimmende kroal-oge
ze pikde
de pieng oet mieng wöad
die uëver zaote lippe koame
alling de zeutigheed
is uëvergeblieëve
en d’r zank
d’r zank
sjoert in miene kraag
en kraakt
tussje mieng teng
ze vloog óp
in de sjtrakke blauw lóf
woar inins voet
noom mieng ieëland mit
en brach dich doavuur trük
nieëvele
troag
trekke breëkbaar nieëvele
langs de grieës gieëvele
langs ziepe
kanjele
en rije greun dreksbek
de sjtilte weëd veulbaar
de tek van de beum
weëve diffuse zjwatte netwerke
de lampepöal
wane zich verzjwómme bakes
in ing sjpegelgladde
grauw zieë
nieks mieë
dat zich nog weëgt
in dit intense geluid van de sjtilte
kirksjtroat
de sjteëkende zon
brent löaker in de roeë klinkere
inne vale bastaard
mak zich
mit d’r sjtats tussje de poeëte
tikkend oet d’r sjtub
de vuëgel zjwiege
de beum haote d’r oam i
’t broen hoot
van de krakende kirkduur
lut mar winnig los
gebroake noeëte
van inne dreuvige örgel
inne zjwatte cilinder
witte blómme
ing dun zjwaad wierook
flarde va zalvende wöad…
…en de sjteëkende zon brent
gezichsbedrog
de vergriesde klam wermde
van inne verreënde meidaag
hink nog in de lóf
de glaze hoeser
rije zich anee
’t zatte greun
hink verlore an de tek
mieng gedanke
haote zich koesj
miene blik
sjprik wöad
die ginne kan huëre
missjien de lüj
hinger ’t glaas
mar hun rugke
geëve gee antwoad
ich loop wier
noa ’t punt
woa de glaze lijne
beijee kómme
’t noajoar en ich
same
óp inne bónkbroene teppich
inne gobelin
va blaar en tek
krakende tek
in mieng oge
gesjtapeld ’t birkegeël
in mieng oere
bulderend d’r wink
óp mieng tóng
d’r sjmaak van de
knapperig zaote herfslóg
in mieng naas
de prikkeling van
vergankelijke muffe busjlóg
en óp mieng hoeëd
de ieësjte tinteling van
d’r aakómmende winkter
same
ich en ’t noajoar
d’r horizon vuurbei
langs d’r geële
durchzichtige busjrank
weëd de hoeëd
in vieëfvoud oape gerieëte
de frissje broen vore
zint bezieënd mit
inne zjwatwitte puzzel
va kroas en mieuwe
durchee gewórpe
durch inne roeë traktor
get wier
vette griesgrauw winktergöas
in ’t sappig greun
en d’r wink
d’r wink
hat vrij sjpel
drieëg mien gedanke voet
wied voet
uëver d’r puzzel de vuëgel de velder
langs miene ege sjatte
vuurbei d’r horizon
late lampe
ónger ’t blauw lich
va late lampe
ving ich blink
d’r weg
d’r weg noa heem
d’r weg noa dich
nog effe
bónkte tekste kieke
en da
wil ich nieks mieë
alling nog mar
loestere noa diene oam
mich lave an diene nektar
en pas
mörgevreug
wer kieke
noa de oetgebluste lampe
die sjtil wade
óp de nuie nach
zóndig
de beum
zint ómlieëg gekómme
hant de zieëp
ee rose accent gegoave
d’r grieëze zóndig
sjpegelt zich
in ‘t dunne grieze water
ee paar bónkte
perrepluvlekke
probere te laache
en lope huppelend
de sjtroat oet
inne vette zescilinder
rauwelt duuster
en sjprietst ’t water
teëge de vinstere
woa ’t langzaam
ómlieëg lup
noa de rose zieëp
zóndigmiddig
november
ee kaod zönke
truk lang sjattes
óp de geël blaar
ee klee hundje
bletsjt teëge nieks
teëge de leëgte
de hingergeblieëve vootsjtep
va zjwieëgende lüj
die in zjwatte jes
langs de roeë gieëvele zjweëve
inne vlieger
sjpliet de sjtilte
de zon mak ze wer tow
oane pieng en pleisters
en sjrief de littekes
ónger mieng hoeëd
de drei letste blaar
dwarrele noa de eëd
krisnach
sjtil en duuster
de sjtroat
kaod en zach
d’r sjneei
kloar en werm
’t lich in de vinstere
voetgesjtórve
de koepere klanke
van de fanfaar
oet de kirk
de zjwatte gesjtaltes
op zeuk
noa de gebórgeheed
va wegend keëtslich
en d’r ruëk
va gróffelsneel
winktereppelkes
en frisj dennegreun
Volgende activiteit
17-03-2012