Ónger de Krisjtóffeltore
Zaoterdaag 26 november 2011 - In de Golje Leew is de bloomlaezing Ónger de Krisjtóffeltore geprezenteerd.
Dit nuuj book, ein inisjatief van Oetgaeverie tIC, behilt sjtökskes van Remunjse sjrievers vanaaf 1807. Dink aan bekinde name wie Emile Seipgens, Jo Hansen, Driek Rademakers, Tante Lies, Pierre Huijskens, Jan Laugs, Henri Timmermans, mer ouch laevende en minder bekinde sjrievers. De oetgaever haet t’r mer leefs 69 weite te vinje alles biejein! D'n Uul is greutsj det versjillende sjtökskes oet 't Zjwetskammezaol zeen opgenaome.
Vlnr.: Guus Rüsing, Tof Thissen en Henk Giesbers, veurzitter Veldeke Krink Remunj, kort veur ’t oetreike van de twee ‘eerste’ eksemplare
Nao ein kundige inleiding door dr. Pierre Bakkes waerde de twee 'eerste' eksemplare oetgereik aan Tof Thissen en Guus Rüsing, die 35 jaor geleje es (toen nog) jong men aan de weeg sjtinge van de Remunjse Veldeke Krink. Ingrid Schouten-Minten en Jean-Philippe Laugs droge eder ein sjtök veur van eige handj. Muzikaal waerde de biejeinkoms opgeloesterd door Sjoerpepier, wovan ouch tekste in de bundel zeen opgenomme.
Ónger de Krisjtóffeltore is deil 71 van de Limburgse Literaire Lies (LiLiLi) en is meugelik gemaak door biedrages van o.a. D'n Uul. ’t Book is besjlis eine aanraojer veur ederein dae hilt van oos sjpraok en ouch veur die die ’t al weite mer noojt oetgeleerd zeen is ’t eine must. 't Kos € 17,50 en is te kriege in de Remunjse bookhanjels. ISBN 9-789078-407928.