öpke döpke
2e drök
"Maedje, wils se mit mich pötjesjerre?”
“Nou, den gaon ich mer reipe.”
De jeug van vreuger haaj de ruumte … op sjtraot of op ’n aope sjtök gróndj in de wiek. Allewiel zit de jeug – zaet me - achter de kómpjoeter, de Nintendo DS of veur de tilleviesie. Die kienjer kinne ouch neet meer ech de sjtraot op. Wo vreuger drie automobiele in ’n ganse sjtraot sjtinge, sjtaon noe driehóngerd wages aan de geldjautomaat of naeve de blouw sjtreep duur te doon. De sjtraot is neet meer van de kienjer en de aope veldjes zeen – heel ekonomies – ram vól geboewd. Det is gebeurd in ‘ne tied det veer ós neet rejalieseerde wie kósbaar ruumte is veur de óntwikkeling van kienjer. Same sjpele in ‘ne grotere groep, boete in de frisse lóch, in de wintjer same sjliddere, same trefballe, hinkele, kölse, neum mer op.
Väöl is verangerd, heel weinig is gebleve ... nostalgie? Nae, besjlis neet, ómdet altied weer bliek det kienjer de ruumte neudig höbbe, ouch besjlis neet, ómdet ouch de sjpele van vandaag net zo wie vreuger same gaon mit meziek. Allewiel kump de meziek oet ’n apperaat, vieftig jaor trök maakde me de meziek zelf door te zinge en daobie in de henj te klappe, zo wie bie kaatseballe. De tied trökdrejje, det geit neet, mer naeve de elektroniese sjpelkes is d’r ouch ruumte neudig óm nujerwets op de ajerwetse meneer mitein te sjpele … en te zinge … en blie te zeen: want Öpke Döpke is opnuu oetgebrach: ’n sjiek, gekalligrafeerd book mit versjes, tel- en sjpeelleedjes in ónvervals Remunjs.
Leje van Veldeke-Krink Remunj kinne bie intaekening zoväöl beukskes besjtelle es zie wille à € 5,--, door zoväöl maol det bedraag euver te make op raekeningnómmer 131228897 van Veldeke-Krink Remunj ónger vermeljing van ‘Öpke Döpke’.
’t Beukske is nao euversjrieving op te haole bie Póppedokter Wiermans aan ’t Munsterplein of op de eerskómmende biejeinkóms van oze Krink. In de vrieje verkoup (bie Póppedokter Wiermans en bie Boekhanjel Boum aan de Neersjtraot) geit ’t beukske € 6,50 koste.