Veur de jeug
Euverziech Lèsbreve:
In 2007 versjeen in samewèrking mèt de Veldeke krink Ech de lèsbreef:
Sint Maerte, in 't Echs.
In 2008 versjeen in samewèrking mèt de Veldeke krink Zitterd de lesbreef:
Kirmes, in t Zittesj.
In 2009 versjeen in samewèrking mèt de Veldeke krink Venlo de lèsbreef:
De Schötterie, in 't Venloos.
In 2010 versjeen de lèsbreef d'r Weg in samewèrking met de Veldeke-krink Heële, in 't Heëlesj.
In 2011 versjeen de lèsbreef Mergel in samewèrking mèt de Veldeke-krink Valkeberg, in 't Valkebergs. 't Beukske vertèlt euver mergel, de roumgaele sjtein woamèt in en um Valkeberg en Mestreech väöl geboewd ies gewore, euver wie en woa de sjtein gewonne weurt, fossiele en fauna, euver depe mergelgrotte en wat dao-in allenei gebeurt.
Veldeke geuf saer 2007 lèsbreve oet die gesjreve zint in de Limburgse sjtreektaal. ‘ne Lèsbreef ies ’n mini-beukske wat handelt euver ’n bepaald thema wat toegepas kènt were in ’t ónderwies. ’t Betref hie ónderwerpe oet de Limburgse historie en volkscultuur, gesjreve op ‘t niveau van lièrlinge van de basissjoal oet de lètste groep (11- en 12-jaorige).
Veldeke Limburg haet in 2007 ’t initiatief genómme um lèsbreve oet te geve veur deze doelgroep um dae kènnis te laote make mèt die ónderwerpe. ‘n Belangriek ónderdeil van de Limburgse volkscultuur ies ouch de Limburgse taal, daorum ies edere lèsbreef gesjreve in ’t dialek. Es v’r de exemplare, die tot noe toe zint versjene, vergelieke, vèlt op dat eder oetgaaf in ’n ander dialek gesjreve sjteit. Dat kump umdat in Limburg neet euveral ’t zelfde dialek gekald weurt meh väöl variante. Veldeke besjteit oet 11 kring in gans Limburg en eder jaor ies ‘ne andere krink, oet ’n ander plaats, verantwoordelik veur de invölling van ’t thema. De ièrsjte lèsbreef ging euver Sint Maerte (Sint Maarten), woavan de fièsdaag vèlt op 11 november. Hae ies gesjreve in ’t Echs. Daonao volgde de Kirmis in ‘t Zittesj; de Schötterie in ’t Venloos; d’r Weg in ’t Heëlesj. De lèsbreef Mergel sjteit in ’t Valkebergs en vertèlt euver mergel, de roumgaele sjtein woamèt zoaväöl geboewe rónd Valkeberg en Mestreech opgetrokke zint.
Alle basissjoale in Limburg kriege ’n exemplaar ter inzage toegesjtuurd en kènne daonao graties lèsbreve besjtèlle bie ’t Hoes veur de Kunste in Remung. Veur in ’t documentatiecentrum en um te behandele in de klas in de gesjiedenis- of aardriekskundelès. ’n Geweldig initiatief um oos kinger kènnis te laote make mèt ’t eige Limburg.
Els Diederen