Wikipedia ouch 'op 't Limburgs'
't Besjteit al 'n tiejdje, bienao vief jaor, mèr nog neet eederein wit 't: Wikipedia, de encyclopedie die waerelwied door iederein kint waere bekeke, aangevuldj, gesjreve en verangerd, besjteit auch 'op 't Limburgs' en nog twieë angere Nederlandse dialecte: 't Nedersaksisch en 't Frysk.
Kiek mèr ins op 't internet bie www.wikipedia.nl.
Op de Limburgse oetgaaf van Wikipedia sjtaon noeë zo'n 4800 artikele euver van alles en nog gèt. Vingste dèt d'r get ontbrik, dan kinste dao zelf 'n verhaol euver sjrieve. In 't Gebroekersportael sjteit dèt oetgelag. In d'r Kaffee kinste vraoge sjtelle of dich gèt vreigele mit angere leefhubbers (of sjuus neet) van 't Limburgs dialek.
't Limburgse wikipedia hanteert 't leefste 'n algemein besjaafd Limburgs, in de spelling sowie die door Veldeke-Limburg op papier is gezat. Mèr wae in zieng eige dialek get wilt aanlevere, dae kint dèt auch.
't Belangrikste bie Wikipedia is de inhaud van 't artikel. Es eemes sjpellingsfautjes mak, dan zeen d'r vas waal angere gebroekers die dèt corrigere. De Veldeke-sjpelling weurt kórt en good oetgelag op de 'Wikipedia Sjpellingssjpiekpagina. Kiek mèr op internet bie http://li.wikipedia.org/wiki/Wikipedia:Sjpellingssjpiekpagina. “Mit dit sesteem kans te in prinsip jeder Limburgs dialek opsjrieve. Sómmige plaatsje höbbe 'n eige waordebook; veural in de sjtei mer ummer mier ouch in groete dörper is det 't geval. Es det waordebook ein anger sjpelling gebroek es de Veldeke-sjpelling - det kump nogal ins veur - dan höbs te 't rech die te gebroeke”, meint Wikipedia.